أخبار عاجلة
Worried about a shortage of children's medications? Here's what you need to know -
A federal regulatory blunder could affect an unknown number of drug cases -
What we know about why some kids are missing routine vaccinations -

شعاع نور.../ بقلم نور عبدالله -تورنتو

شعاع نور.../ بقلم نور عبدالله -تورنتو
شعاع نور.../   بقلم نور عبدالله -تورنتو

اخبار العرب- كندا 24:

الحقيقة انا النهاردة مكتبتش مقالة جديدة، بس قريت المقالة دي من على الفيسبوك و حبيت اوي اشاركم بها.

منقول من  صفحة جيلان قاسم..

"مع احترامي لكل قصص الحب العظيمة ، بس أنا أعظم قصة حب شوفتها في حياتي هي حياة جدي ”قاسم“ وجدتي ”رحمة“ Kجدي كان مهندس زراعي .. جدتي مكنتش بتعرف تقرا وتكتب واتجوزها عندها 16 سنة .اخوه اتجوز ست معاها دبلوم معلمين .... وكانت الستات في عيلة جدي بيقولوا لها "الابلة جميلة " .. محدش يجرؤ يناديها باسمها.

الموضوع ده كان مضايق رحمة .. مع انها بكل طيبتها وبرائتها كانت معتدة بنفسها جدا فكانت بتقولها يا جميلة وده طبعا بيضايق جميلة. جدي بقا مسكتش جاب الشيخ عبد العظيم مدرس في المعهد الازهري .. وقاله عايزك تعلم الست رحمة القراءة والكتابة والحساب ...... وكل ده في السر.

الناس فاهمة انه بيجي يحفظ سراج عمي و سلسبيل عمتي القرآن .. لكن هو كان بيجي يعلم رحمة .وبدأت تقرا وتكتب وتحسب وحفظت جدول الضرب ... جدي قالها لو عايزة اقدملك علي الابتدائية انا موافق .. قالتله لا الناس تضحك عليا قالها متخفيش محدش هيعرف .. وفعلا قدم لها في الابتدائية في مدرسة في دمنهور امتحنت ونجحت ..... محكتش ابدا تفاصيل تعبها في انها تاخد الابتدائية في ظل 4 اولاد .. لكن دايما كانت بتحكي عن مؤازرة جدي لها وتسميعه لها وانه كان بيزعقلها في الاملاء اما تجيب 7 من 10 .

مخدتش شهادة غيرها ،بس كانت منتهي التباهي .. واما كانت الابلة جميلة تقولها انا معايا دبلوم المعلمين تقولها وانا معايا ابتدائية القاسم اللي تعب عليها جوزي حبيبي وحفظت القرآن كمان. انا عمري ما سمعت حد فيهم بيقول للتاني بحبك ... بس سمعتها كتير بعد ما تخلص صلاة تفضل تدعي " يارب سايقة عليك حبييك النبي ما توجعني فيه ولا اخد عزاه واجعل يومي قبل يومه .. يا رب انا متحملش اروحه .. هو يروحني وحياة حبيبك النبي .... خليه وهنيه زي ما مهنينا .. واسنده زي ما هو سند لينا ده غلباااان يارب وحمله تقيل عياله متغربين في ارضك وعيال عياله قطط متعلقة في رقبته" وتفضل تسترسل في الدعا كأنها بتحكي لربنا علي حياته وظروفه وبتشرحله موقفه من الحياة، وكأن ربنا سمع منها وهي اتوفت قبله فعلا وهو اللي روحها.

كان جدي بيديها مصروف .. تخده منه وتحطه في بوك اسود جلد هو اللي عامله لها وتحضنه وتقوله يجعلك تدي ما تاخد ابدا يا ضي عيني ... بغض النظر عن اننا كأحفاد كنا بنقلبها في المصروف ده .. لكن كانت تجيب أدهم ابن عمي او تاج اخويا وتقولهم روحوا اشتروا علبة امواس لورد وفرشة سنان وانتوا راجعين عدوا علي عبد النبي اسألوه خلص المناديل اللي طلبتها منه ولا لا .. كانت كل شهرين تلاتة كده تفصل لجدي مناديل قماش بيضا ومطرزة من الاطراف وتكويها وتطبقها ... وعلبة الامواس مع مكنة الحلاقة الجديدة والمشط الاسود الصغنن اللي كانت بتغيره كل اسبوعين ... اصل جدي كان شعره دهني وكانت بتخاف يعمل قشرة، دايما كنت اشوف جدي جايبلها شرابات عشان كانت بتقف في المطبخ كتير وميحبهاش رجلها تسقع و يجيب الحنة ودم الغزال ويعجنها بايديه .. ويحني لها شعرها بايديه بردو ... واما واحدة من عماتي يقولوا لها تعالي نغسلك شعرك يقولهم كفي نفسك ياختي انتي وهي انا هغسلها شعرها من الحنة.

كان عاملها علبة خشب بايديه عشان كان هاوي النجارة .. ومشط خشب ومكحلة و علبة زبدة شفايف، كتير جدا كنت بشوفه جايب كيس فيه حلويات ويطلع بيه علي اوضته ... بنعرف ساعتها انه لها .... ياما كان ياخدها ديليس عشان كانت بتحب الجاتوه بتاعه ... واما قالتله العيال عيالك دخلوا السيما وانت مسافر مع مراتاتهم وسابوني ... قعد اسبوع ياخدها السينما ويوم الخميس خدها وسافر القاهرة اتفرجوا علي مسرحية اسمها جوز ولوز بتاعت احمد بدير هي كانت بتحب احمد بدير جدااا

في المولد كان بيجيبلها عروسة المولد لحد ما اتوفت .. واول عيدية بتطلع في العيد لها هي .. و اول كحكة بتطلع من الفرن بتغرقها سكر وتجري تحطها في بقه وتبوس دماغه .. وتقوله إلهي دايما عامر بحسك وما يقطع منه الخير ابدااا

واما كانت تعمله القرفة يقولها اوعي بقا صوباعك يلمسها أحسن سكرها يزيد ومعرفش اشربها .

حتي اما تبقا مقموصة منه .. وتحضر الاكل يقعد ميقومش فتقول لأي حد روح نادي جدك  يقول مليش نفس وبطني وجعاني  تجررررري تقوله مالك وجعاك من ايه اغلي لك نعناع بس انا بردو مخصماك .. يقولها ما ده اللي واجع بطني فتضحك ويضحك وخلاص .في عز المواقف الصعبة لأولادهم مكنتش بسمع منهم كلام .. كنت بشوف نظرات وكأنها شفرة خاصة بينهم لما عمتي بيهان اطلقت بعد شهرين من جوازها .. اخدتها و راحت بيها فرح في العيلة واللي يقولها بيهان اطلقت ليه بس ؟

...“تقولهم الهانم اللي ما يتعرف قيمتها تلزم بيت ابوها ويروح ارنب يجي سبع ”... وبرغم من كل البراءة دي كانت قوية .. قوتها مستمدة منه .. لما شيراز بنت عمي فرحها باظ قبل الميعاد ب 3 ايام مرضيتش تفك فروع النور علي البيت وقالت ده خير .. العيلة دي مكنتش حباها وهنعمل ليلة لأهل الله ونجيب المداحين ونفرح .. احنا بناتنا متحزنش علي رجالة طول ما عيلتها فيها رجالة في ضهرها .. جدي قالها والله ما منزلك كلمة.

اما انا رجعت من العراق كانت واقفة مستنية في البلكونة واول ما نزلت من العربية قالت شيلوا اختكم يا ولاد .. الغالية تتشال يا ولاد ما تتبهدل ابدا ومكنتش حكيت لها علي البهدلة اللي بجد .. ولهفت ديالا من علي كتف سيف وحضنتها وقالت لها باااااااس انتي هنا في بيت قاسم يعني لا دبابات ولا طيارات يقدروا يجوا جنبك .. كان اسمه بالنسبة لها يعني الامان و هي بالنسبة له اسم علي مسمي رحمة

في اصعب المواقف ...في جنازة عمي وجنازة بابا كنت بشوفها ماسكة في ايد جدي جامد وكنت بشوفه بعد الدفن واخدها في حضنه و يمسح علي شعرها ويقرا يس ويمسح دموعها ويستناها راحت في النوم .. نزل هو خلوته وقعد يعيط

ماتت في العمرة .. جدي رجع بيها شعره ابيض .. معرفش الشعر ده اتحول كده ازاي  وقعد الكام سنة اللي عاشهم بعدها سرحان فيها ... بيتغزل في عيونها وشعرها الحرير ويطلع جلاليبها تتغسل وتتكوي ويرصها تاني في الدولاب .. واما حد يسأله تحب تاكل ايه ... يقولهم محبش الا اللي تحبه رحمة الاتنين دول هما اللي علموني ان الحب مش شعر ونثر ... الحب فعل ... فعل بيخلي اللي قدامك مبهور بالحب اللي بينكم ..الحب مودة وعطاء ... وقوة و استقواء

عشان اللي بينهم ده ...عرفوا يربوا 7 اولاد احسن تربية ويخلوهم متميزين .. ومن بعدهم احفاد حاسين بتفردهم وتميزهم عن العالم ومزروع جواهم الاستحقاق كانوا دايما يقولوا لنا انتوا القواسم...    

    نور عبدالله/ تورنتو

 

 
c 1976-2021 Arab News 24 Int'l - Canada: كافة حقوق الموقع والتصميم محفوظة لـ أخبار العرب-كندا
الآراء المنشورة في هذا الموقع، لا تعبر بالضرورة علي آراء الناشرأو محرري الموقع ولكن تعبر عن رأي كاتبيها
Opinion in this site does not reflect the opinion of the Publisher/ or the Editors, but reflects the opinion of its authors.
This website is Educational and Not for Profit to inform & educate the Arab Community in Canada & USA
This Website conforms to all Canadian Laws
Copyrights infringements: The news published here are feeds from different media, if there is any concern,
please contact us: arabnews AT yahoo.com and we will remove, rectify or address the matter.