أخبار عاجلة
كندا ترصد 15 إصابة بجدري القرود وتتوقع المزيد -

من كل بستان وردة/ سويعات باردة..... دافئة في ظل القدير /بقلم: الدكتورة :نعمات موافي/ تورنتو

من كل بستان وردة/ سويعات باردة..... دافئة في ظل القدير /بقلم: الدكتورة :نعمات موافي/ تورنتو
من كل بستان وردة/ سويعات باردة..... دافئة في ظل القدير /بقلم: الدكتورة :نعمات  موافي/ تورنتو

اخبار العرب- كندا 24: ثلوج كثيفة.. رياح شديدة تجعل الرؤية مستحيلة.. تعطيل المدارس.. هو فيه آيه؟

 

فيه عاصفة ثلجية.. تمام وآيه الجديد ما احنا في كندا والعواصف الثلجية عادي جداً.. مالهم كده مأفورين.. وطبعاً الفهلوة المصرية تؤكد التآفور.. ياه الكنديين دول فرافير.. يا ستي سيبك منهم, أحنا ننزل نروح اكل عيشنا.. وأجرنا على الله.. الولاد مارحوش المدارس.. بس أنا هنزل الشغل..

وهنا ابتدأت الحدوتة يوم الاثنين الموافق 17 يناير 2022.. الطريق يأخذ حوالى من نصف ساعة لساعة إلا ربع.. ياه الرؤية صعبة قوى.. زحلقة ماشي.. طيب عربيات غرزت في الثلج مايضرش.. مخارج طرق مش باينة, طيب معلش.. قول زي ما أنت عايز.. والمُطر يركب الصعب.. المُهم الطريق أخذ حوالي ساعتين ونصف.. بس اوعي وشك.. وحلق حوش.. المهم وصلت ولله الحمد..

أوعي تفتكر دى النهاية.. أطلاقاً استنوا عليّا.. كمل قراءة.. هاتنبهر.. بس ما تتخضش..

أنتهيت من الشُغل الحمد لله ويلا بقى ها نروح.. قشطة جداً.. لا مش قشطة خالص.. العربية محاطة بجبال الثلج ناصع البياض.. جميل خالص مالص.. بس هانتحرك ازاي.. المهم تضافرت جهودنا كلنا العاملين في نفس المكان وساعدنا بعضنا البعض وخرجنا من البركينج لوت.. بفتح الراديو لأتابع الآخبار.. اغاني ودفا والدنيا ربيع وقفلوا على كل المواضيع.. ولا آخبار عن أى طرق مقفولة.. اطلاقاً..

ودخلت علي الهاي واي وبالتحديد “401" (كلمة أنيقة للطريق السريع).. المهم كان المشهد رهيب، تلال ثلوج في كل مكان، وكان ارتفاع الثلوج فى بحر الطريق حوال 50 سم، الغريب لم ارى كاسحة ثلوج واحده فى الطريق، تعجبت وقلت ازاي يعني.. الناس دي بتهتم اوى بالموضوع ده ولو فيه عاصفة تلاقي كاسحات الثلوج ورش الملح شغالة طول الليل.. ولا أم المطاهر.. أحنا في كندا.. هو احنا في أي حتة.. البلد دي التلج لعبتها.. واخترعوا العاب أوليمبية تلجية.. كندا جاهزة قوى لاي كوارث وعواصف لأنها مجهزة لأشرس العواصف الثلجية..

المهم  الساعة تقترب من الرابعة عصراً، كانت حركة العربيات بطيئة جداً، وعلي يمينك مقطورات غرسه فى الثلج وعلي شمالك عربيات وأتوبيسات بتتزحلق.. وأنا الغلبانة ماشيه في النص.. وفجأة توقفت الحركة تماماً، فلا حركة للأمام ولا استطيع الرجوع للخلف بسبب الكم الهائل للسيارات خلفي.. ومرت الساعة الخامسة وأنا اقول هانت.. ومرت االسادسة وأنا أقول هاتتعدل، درجة الحرارة حوالي -25، العربية  واقفة ولا استطيع غلقها من أجل التدفئة، ومرت الساعة السابعة وأنا أنظر حولي، كل الناس فى سيارتهم.. مُحاطة بمقطورات من جميع الأتجاهات.. كلٌ يعيش حياته مع سيلفونه.. وفجأة بدء الشيطان عدو الخير يوسوس فى ذهني بعد أن نظرت لأمبير البنزين.. يا الله ده انا واقفة بقالي 4 ساعات في نفس النقطة!!

يادي المصيبة بنزين السيارة وصل للثلث ولا أستطيع أن أغلق السيارة من أجل التدفئة.. حاولت اشغل نفسي واعمل أى حاجة ممكن تتعمل.. أروق العربية.. اكلم الأولاد.. اعمل شوية تليفونات متاخرة.. طيب آكل.. مأفيش اكل.. قهوة.. مية.. حتى الماء مافيش.. لكن الوساوس الشيطانية تزداد أكثر فأكثر..

قفلت العربية  علشان البنزين لا ينفذ لمدة 3 ساعات كمان.. واحنا واقفيين.. دلوقتي الساعة  العاشرة مساءاً أبحث فى الأنترنت عن أى أخبار للمصيبة التى أنا فيها، مافيش اخبار وتعتيم كامل وكأن (401) أصبح فى كوكب زحل..

الوقت يمر بطيئ إلى أن جاءت الساعة الحادية عشر وهنا أحسست ببشاعة وخطورة الأمر وبرغم طول وقت الانتظار وانا بكلم ربنا وبدعيله وبقوله عارفة انك حافظني.. وقتها رفعت عيني نحو السماء الداكنة وكأنها مغلقة أمامي.. بداءت أنادي الحي القيوم، وكأن نفسي وروحي تنتشب به فأمسكت به، أنقذني لأنني كدت أغرق فى يأسي الشديد تماماً.. ولسان حالي : حتي لو خرجت فاحتمال الخروج من الازمة يكون بتداعيات صعبة.. يعني المقطورات الكبيرة بتغرز.. انا هعمل ايه؟.. الاتوباصات بتتزحلق.. خروجي من غير تلفيات ها يكون معجزة كبيرة!!

وفجأة بدأ قلبي يفيض بالشكر لأبو المراحم، للرحمن الرحيم، الملك القدوس.. قلبي يفيض بالمحبة والسلام والفرح، وصوته فىَّ يقول لي " ماتخافيش, انا معاكي, ملائكتي حالة حولك لحمايتك وخدمتك، أنا معكِ"، صوته يملء كل كياني، يشعل روحي، يدفئ جسدي..يطمئني...وتفيض مشاعرى بالأمان....

عجباً الساعة الأن الحادية عشر والنصف وبدأت السيارات تسير ببطيء.. وبدأت الحياة تبرق حولي.. وخرجت من أول طريق جانبي.. وصلت اول محطة بنزين حوالي الساعة الواحدة والنصف صباحاً..  فولت العربية بالبنزين وآكلت وركنت عند العمل ونمت.. وساعتين ودخلت الشغل.. نشيطة جداً.. في حالة من الحمد والشكر والابتهاج والفرح لأنني في حفظ الرحمن أبو المراحم.

شكراً يا ربي وإلهي على كل حال وفى سائر الآحوال لأنك أبطلت كل وساوس الشيطان، وأنقذتني وأحط بي من كل جانب وصنتني وحفظتني كحدقة العين، فكنت معي ففاض قلبي بسلامك العجيب ومحبتك ليَّ.. فكانت سويعات بين يدي القدير القادر الذى لا يعثر عليه أمر. 

نعم أحبك فأنت الله الرب أعظم رب وأحن اب..

 

  د.نعمات  موافي/ تورنتو

 

 
c 1976-2021 Arab News 24 Int'l - Canada: كافة حقوق الموقع والتصميم محفوظة لـ أخبار العرب-كندا
الآراء المنشورة في هذا الموقع، لا تعبر بالضرورة علي آراء الناشرأو محرري الموقع ولكن تعبر عن رأي كاتبيها
Opinion in this site does not reflect the opinion of the Publisher/ or the Editors, but reflects the opinion of its authors.
This website is Educational and Not for Profit to inform & educate the Arab Community in Canada & USA
This Website conforms to all Canadian Laws
Copyrights infringements: The news published here are feeds from different media, if there is any concern,
please contact us: arabnews AT yahoo.com and we will remove, rectify or address the matter.