اخبار العرب- كندا 24: عايشيين بين لحظة رايحة ولحظة جاية ، ناسيين خالص اللحظة اللي احنا فيها، بنضيع عمرنا زعلانين وندمانين على موقف عدى و فات، وبين خوف وقلق وتوتر من مستقبل منقدرش نتحكم فيه، بننسي خالص اننا نملك بس اللحظة اللي احنا عايشيين فيها، عقلنا مشغول بذكريات، افكار ، مخاوف، قلق، توتر ، ترقب وعد زي مانت عايز!!! …..
هتقولولي ازاي ايه اللي انت بتقوليه ده وانا أتحكم في عقلي وفي افكاري ازاي؟، هقولك، ببساطه لما تفهم ان عقلك وافكارك تقدر تتحكم فيهم زي اي جزء في جسمك وانك عندك القدرة انك تتحرر من القيود الفكرية التي انزرعت في عقلنا في سنوات حياتنا الاولي او اكتسبناها، وعقلنا خزنها وأصبحت المرجع الأساسي له في كل موقف..
مش قولتلي ازاي انا بقي هقولك ازاي، الفكرة بسيطة قوي وعلي قد بساطتها ممكن تاخد مننا شهور أو سنيين علشان نقدر نتقنها بجد، الفكرة هي الممارسة والتدريب لعقلك وقكرك في كل لحظة وموقف بتعدي عليك وده عايز وعي كامل للحظة اللي انت عايشها دلوقتي والان. ازاي بص يا باشا وبصي يا هانم ، يعني مارست التوتر والقلق والترقب في كل موقف يعدي عليك في الحياة هتبقى استاذ فيه وهتاخد دكتوراه كمان!!، وهتوصل لمرحلة من القلق انك ممكن تقلق من ابسط الاشياء واهيفها كمان ، وعلي الناحية الأخري مارست الندم والحزن هتيبقي برده معلم ومش هتسيب اي فرصة او موقف او مناسبة حصلت متندمش على حاجة فيها، وهتوصل معاك انك تندم علي كوباية شاي كان نفسك فيه و مشربتهاش وممكن لو شربتها هي هي نفسها تندم انك شربتها برده...اه والله زي ما بقولك كده.
هنا بقي ييجي الحل نعمل ايه….. العمل عمل ربنا طبعا هههههه….فهلوة مصرية
الحل اننا نمارس وندرب عقلنا وتفكيرنا على الامتنان والشكر والحمد والفرحة والدهشة لكل موقف وحاجة صغيرة تعدى علينا في يومنا وفي حياتنا، بعد شوية طالت او قصرت هتلاقي انك بتشكر وممتن لكل موقف عدى عليك حلو او وحش وارتفعت طاقتك و ذبذباتك وهتقدر تجذب كل حاجة حلوة لحياتك وتسخر الدنيا كلها ليك.
الخلاصة: عيش اللحظة، عيش الامتنان ، عيش بالروح والعين والقلب . ضحك ولعب وجد وحب ….. عيش !!
نعمات موافي/ تورنتو
